Dennis, sarap na sarap sa luto ni Jennylyn!

MAGANDANG birthday gift para kay Dennis Trillo ang pagwawagi niya bilang best supporting actor sa katatapos lang na Golden Screen Awards para sa pelikulang Mano Po 6.

Sa May 12 ang birthday ni Dennis, kaya ganun na lang ang tuwa niya nu’ng magwagi siya ng award.

Sabi pa ni Dennis, hindi raw niya inaasahan na mananalo siya ng award, dahil alam daw niyang magaga­ling ang mga kalaban niya.

Nu’ng mga oras na katsikahan namin si Dennis ay hindi pa niya naibabalita kay Jennylyn Mercado ang pagwawagi niya ng award.

At wala pa sa isip niya kung paano isi-celebrate ang pagwawagi, dahil kailangan daw niyang bumalik agad sa taping ng teleserye nila ni Jennylyn.

Anyway, limang taon daw ang binilang bago siya nagka-award ulit, kaya memorable raw sa kanya ang nakuhang award ngayon. Huli siyang nanalo ng award noong 2005 para sa pelikulang Aishite Imasu na pinagbidahan ni Juday.

Kaya ramdam na ramdam daw niya ang sobrang kaligayahan.

Anyway, hindi pa napaplano ni Dennis ang selebrasyon ng birthday niya, dahil ang alam daw niya ay may taping siya sa araw na ‘yon. Posibleng sa May 11 raw siya mag-celebrate dahil ‘yun daw ang araw na wala siyang taping. Kung magagawan ng paraan, plano niyang magbigay ng kaunting salu-salo sa ta­ping nila, bilang selebrasyon na rin ng birthday niya, at victory party na rin.

Nu’ng mabanggit namin ang pangalan ni Jennylyn kay Dennis ay biglang nagningning ang mga mata ng aktor. Pag-amin niya, malaki ang naging kontribusyon ni Jen para maging masaya siya ngayon.

‘Yun nga lang, ayaw pa rin niyang kumpirmahin ang relasyon nila ng aktres. Una­waan lang ang deskripsyon niya sa namamagitan sa kanila ni Jen ngayon.

Anyway, hindi maipaliwanag ni Dennis kung paano sila nagkalapit ni Jennylyn. Hindi rin niya maipaliwanag kung ano ang meron sila ngayon ni Jen.

“Ganun pala talaga ‘yon, na hindi mo inaasa­han na may taong dara­ting sa buhay mo. Hindi mo alam na nasa tabi mo lang pala siya,” sey lang ni Dennis.

Puring-puri ni Dennis ang pagiging malambing at maasikaso ni Jennylyn sa kanya. Ipinagluluto pa raw siya nito, at sarap na sarap daw siya sa seafood pasta na madalas lutuin ni Jen sa kanya.

Siyanga pala, sampung araw na lang ang nala­labing taping days ng teleserye nilang Gumapang Ka Sa Lusak, pero tiniyak ni Dennis na hindi doon matatapos ang magandang unawaan nila ni Jennylyn.

Sigurado nga kasi na hindi makakasama ni Dennis si Jennylyn sa next pro­ject nito na Endless Love, dahil sina Marian Rivera at Dingdong Dantes ang mga kasama niya roon.

Pero, titiyakin daw ni Dennis na magkakaroon pa rin sila ng communication ni Jennylyn, dahil siya mismo ay ayaw raw niyang maputol ang kanilang samahan.

Siyanga pala, itinanggi ni Dennis ang balitang madalas silang magkasama sa lakaran ni Jennylyn, kasama ang kani-kanilang mga anak na sina Alex Jazz at Calix.

Ayon kay Dennis, nagkita lang sina Jennylyn at Calix nu’ng bago magpunta ng Amerika at nu’ng bumalik sa Pinas si Calix. Isang buwan daw nagbakasyon si Calix sa States para makasama ang mga nag-alaga sa kanya roon.

Si Dennis naman, nakikita lang daw niya si AJ kapag dumadalaw siya sa bahay ng aktres at kapag dinadala ni Jen ang bata sa taping nila.