ELECTION WATCH: Senator Jinggoy Estrada: "We'll pull a surprise on election day."

Ilang araw na lang at magaganap na ang national elections. Pero ayon kay Sen. Jinggoy Estrada, "Hindi pa rin namin nakukumpleto ang pag-ikot sa buong Pilipinas."



Sa presscon na ipinatawag para sa kanya ng masugid na supporter na si Mother Lily Monteverde ng Regal Films, sinabi ng reeleksiyonista, "Siguro mga 80 percent pa lang ang naiikot namin. Ang last two weeks, hindi n'yo na siguro kami makikita sa Manila kung hindi nasa probinsiya kami. Susuyurin namin yun. Ako, yung Region 6 pupuntahan ko, dahil hindi pa namin napupuntahan yun."



Base sa mga surveys, hindi bumababa sa posisyon na number 1 or 2 ang senador.



"I feel very elated and I feel very humble," ang reaksiyon niya doon.



KRIS AQUINO'S APOLOGY. Kailan lang, may lumabas na nag-sorry raw sa kanya si Kris Aquino. Ito'y kaugnay sa binitiwang opinyon ni Liberal Party (LP) standard-bearer na si Sen. Benigno "Noynoy" Aquino III noong Marso na mali ang ginawang pagbibigay ng pardon ni President Gloria Arroyo kay former President Joseph Estrada, na pinatalsik sa tungkulan noong 2001, at gayundin sa mga sundalong convicted of conspiracy sa pagkamatay ng kanyang amang si Sen. Benigno Aquino Jr. noong 1983.



Pero ayon kay Sen. Estrada, "Ah, hindi, yung naging comment lang yata ni Senator Noy tungkol sa naging pardon na ibinigay [kay dating Pangulong] Estrada. Kasi sabi yata ni Noy, he's not in favor. Sabi ni Kris, she apologized, not in behalf of Senator Noynoy, but in her personal capacity dahil nagkaroon nga ng konting hindi pagkakaintindihan."



Ayon sa senador, ang mas isinusulong niya talaga ay ang kandidatura ng kanyang ama, si dating Pangulong Joseph Estrada.



"Right now medyo dehado kami. Based on the reaction and based on the crowd na nama-muster namin tuwing rally, palagay ko we'll pull a surprise on election day. God willing."



Kumusta naman ang dating Pres. Erap sa mga resulta ng surveys?



"He's okay. Kailangan pang mag-triple time siguro. Pero palagay ko, makukuha naman siguro namin."



OPINION ON AUTOMATED ELECTION. Anong masasabi niya sa posible raw na dayaan sa election o magkakaroon ng failure of election? All-out ba ang paniniwala niya sa automated election?



"May duda, may duda ako. Ang sinabi ko naman ever since, during my previous interview, sana, hindi ginamit yung automated election dito sa presidential election dahil itong election na ito, napakaimportante at napaka-crucial para sa sambayanang Pilipino at para sa ating bansa.



"If you fail in this election, mapapahiya na naman tayo sa mga neighboring countries natin. Sa bansang dayuhan."



SHARON CROSSES PARTY LINES. Habang ginaganap ang pa-presscon ni Mother Lily sa Imperial Palace Suites sa Quezon City noong Huwebes, April 22, nasorpresa halos ang lahat sa biglaang pagdating ng Megastar na si Sharon Cuneta.



Dumating si Sharon kahit na magkaiba sila ng partidong kinabibilangan, bilang pagpapakita pa rin nito ng suporta sa isang kaibigan. Ang asawa ni Sharon na si Francis "Kiko" Pangilinan ay LP, habang ang partido ni Estrada ay ang Pwersa ng Masang Pilipino.



"Siyempre nabigla at nagulat ako sa pagdating ni Sharon," ang sabi ni Senator Estrada. "Alam mo, si Sharon has always been a dear friend of mine, ever since. Kahit na nagkaproblema kami noong 2001 at nasa kabilang partido siya, I never took it against her.



"She still remain as my dear friend. Alam mo, kahit noong nakakulong ako, noong marinig ko na magkakaroon siya ng concert sa Araneta Coliseum, gustong-gusto kong manood. I texted her na, 'Gusto ko sanang manood ng concert mo, kaya lang nakakulong ako. Siguro paglabas ko, manonood ako ng concert mo.'



"And she texted back. Parang nagulat siya sa text ko. Parang napaiyak pa nga si Sharon sa akin noong kausap ko siya over the phone at nagulat siya. Despite of all the things that happened to us, naalala ko pa siya."



Ang pagkakakulong na tinutukoy ni Estrada ay ang pagtsa-charge sa kanya noong 2001, habang town mayor pa siya ng San Juan, bilang co-conspirator ng kanyang ama sa protection racket para sa jueteng. Pinayagan siyang mag-bail noong 2003, at noong sumunod na taon ay matagumpay siyang tumakbo para sa Senado.



Inamin ng senador na may gusto siya sa Megastar noon, pero, "hindi puppy love yun, true love yun!"